Davíð Smári Lamude þjálfari Vestra segir að það hafi verið sorglega léleg blaðamanneska af hálfu Bjarna Helgasonar á Morgunblaðinu þegar hann skrifaði um málefni Vestra og Fylkis.
Vestri sakaði leikmann Fylkis um rasisma eftir leik liðanna á dögunum, ekki var hægt að sanna brot þessa leikmanns og hætti KSÍ rannsókn á málinu.
Í grein Bjarna var talað um að ásökun Vestra væri rógburður en við þetta er Davíð Smári ósáttur.
„Ég er búinn að lesa þessa grein og ætla að vera hreinskilinn. Mér finnst þetta sorglega léleg blaðamennska þar sem hann talar við annan aðilann í málinu og í öðru lagi er hann stuðningsmaður annars liðsins,“ sagði Davíð Smári við Fótbolta.net í gærkvöldi.
„Mér finnst þetta rosalega léleg blaðamennska og ætla að vera alveg hreinskilinn með það. Mér finnst eiginlega skammarlegt að þessi aðili sé titlaður sem aðstoðar ritstjóri íþróttadeildar Morgunblaðsins. Það er eitthvað sem ætti að vera skoðað alvarlega það því það er verið að ásaka okkur um lygar.“
Davíð Smári segir að sinn leikmaður hafi upplifað samskiptin sem rasisma og stendur við það. „Við sjáum ekki eftir neinu og miðað við viðbrögð leikmanns okkar er það galin hugmynd að hann sé að gera sér þetta upp,“ sagði Davíð við Fótbolta.net
