Adam Ægir Pálsson, leikmaður Vals, var gestur í nýjasta þætti af Íþróttavikunni á 433.is. Helgi Fannar Sigurðsson og Hrafnkell Freyr Ágústsson hafa umsjón með þættinum.

Það fór ekki framhjá neinum þegar Gylfi Þór Sigurðsson gekk í raðir Vals fyrir leiktíðina. Hann fékk númer Adams, 23 og fór Adam í 24. Adam var þó ekki alveg til í þetta frá byrjun.

„Í æfingaferðinni var frekar ljóst að hann væri að koma. Ég er mikið með Aroni Jó, Kidda, Sigga og þessum eldri mönnum í hópnum. Siggi segir við mig að hann ætlaði að taka númer 23 og ég bara „ekki séns.“ Ég var fyrst grjótharður en svo sendi hann á mig sjálfur og þá var erfitt að segja nei.

Maður segir ekki nei við Gylfa Sig. Hann er geitin og maður á bara að gefa honum númerið ef hann vill það,“ sagði Adam léttur.

Hann uppskar þó glæsilega mynd af honum og Gylfa þar sem númeraskiptin voru tilkynnt.

„Það var díllinn,“ sagði Adam og hló.

Umræðan í heild er í spilaranum.

Íþróttavikan er í boði Bola léttöl og Lengjunnar