KR rak í gær Gregg Ryder úr starfi þjálfara eftir slakan árangur undanfarnar vikur en ákvörðunin hafði legið í loftinu í einhvern tíma.
Ryder var á sínu fyrsta tímabili með KR en ráðning hans síðasta haust vakti furðu margra enda höfðu margir afþakkað starfið hjá KR áður en kom að Ryder.
Rætt var um málið í hlaðvarpsþættinum Þungavigtin í gær. „Hann var sá útvaldi eftir margar vangaveltur, þá var þetta niðurstaðan að Ryder væri rétti maðurinn í starfi. Hann var það ekki frá fyrsta degi eða fyrsta bjór. Spilaði fótbolta sem hentaði ekki liðinu, sótti leikmenn sem hentaði ekki þessum leikstíl,“ segir Kristján Óli Sigurðsson fyrrum leikmaður Breiðabliks í þættinum.
„Það eru margar ákvarðanir sem eru furðulegar.“
Kristján velti því fyrir sér hvort slæmur árangur KR síðustu árin væri eitthvað sem Páll Kristjánsson, formaður knattspyrnudeildar þyrfti að axla ábyrgð á.
„Kvennaliðið er í C-deild í kvennaboltanum, þegar Páll tók við árið 2020 sem formaður talaði hann mikið um að KR væri að fara aftur í hæstu hæðir. 2021 er besta tímabil liðsins eftir að Páll kom inn og það er þriðja sætið. 41 stig og sjö stigum á eftir Víkingum sem unnu.“
„Svo kemur 2022, 4 sæti með 38 stig og 25 stigum á eftir Blikum sem vinna mótið. Svo í fyrra tók steininn úr, sjötta sæti og 29 stigum á eftir Íslandsmeisturum Víkings. KR eru í öðrum flokki en Valur, Víkingur og Breiðablik.“
Hann spyr sig að því hvort Páll þurfi að axla ábyrgð. „Það er spurning hvort Páll þurfi ekki að fara að axla ábyrgð? Hann er æðsti maður knattspyrnudeildar, eftir að þeir byrjuðu að tapa leikjum þá er mikið talað um KR. Hann talaði um traust eftir að þeir byrjuðu að tapa leikjum, traustið fór út á haf. Ég hef ekki trú á því að Páll verði formaður KR mikið lengur.“
Mikael Nikulásson tók þá til máls og vildi að leikmenn myndu taka ábyrgð. „Það er auðvelt að skella skuldin á þjálfaranna, þetta eru margir sömu leikmennirnir þarna síðustu ár. Finnur Tómas, Theodór Elmar, Kristján Flóki, Atli Sigurjóns, Ægir Jarl. Þeir fá alltaf nýjan þjálfara en spilamennskan alltaf hálf ömurleg. Ryder átti að gera betur, mér finnst búin að vera þvílík pressa á honum. Íslendingar elska þegar einhverjum gengur illa, það má sannarlega segja það í þessu tilfelli,“ sagði KR-ingurinn geðþekki.
Mikael segir að Páll spili ekki leikina, slái ekki völlinn eða setji gervigras á hann. Hann segir svikin loforð Reykjavíkurborgar um uppbyggingu á svæðinu hafa reynst félaginu erfið.
„Árangurinn er ekki góður með Pál sem formann en hann er ekki að spila leikinn. Palli slær ekki völlinn eða leggur nýtt gervigras, hann er enginn Abramovich. Það þarf að sækja fjármagnið og einhver að koma með það. Það er alltaf verið að bíða eftir svaka aðstöðu, Reykjavíkurborg er búin að taka KR í rassgatið í mörg ár. KR er búið að vera með flotta leikmenn í mörg ár, Ryder er rekinn og kannski verður þetta æðislegt núna.“
