Arnar ræddi við 433.is í dag í kjölfar blaðamannafundar sem Valur hélt á Hlíðarenda fyrir leikinn gegn Víkingi á þriðjudag. Víkingur tryggði sig í gær í undanúrslit bikarsins og er þá á leið í undankeppni Meistaradeildar Evrópu fyrri hluta næsta mánaðar.
„Nú tekur við tímabil sem íþróttamaður þar sem þú ert bara að fara í einhverja veislu. Auðvitað er leikjaálag en plís ekki fara að væla um það þegar gulrótin er að komast í úrslitaleik, þegar gulrótin er að vinna deildina eða komast í 2. umferð í Meistaradeildinni. Slökum aðeins á í vælinu varðandi leikjaálag. Við erum bara ótrúlega stoltir og það eru forréttindi að vera í þessari stöðu. Við ætlum að njóta þess,“ sagði Arnar.
Víkingur tryggði sig sem fyrr segir í undanúrslit bikarsins með sigri á Fylki í gær. Liðið hefur unnið bikarinn allar götur síðan 2019, en keppnin var blásin af vegna kórónuveirunnar 2020. Nú eru lærisveinar Arnars komnir þetta langt í keppninni enn eitt árið.
„Mér finnst eins og fólk sé ekki alveg að gera sér grein fyrir hvað þetta er mikið afrek. Maður heyrir umræðuna, stundum erum við heppnir með andstæðing og svoleiðis. Það getur vel verið að það sé rétt en í bikarkeppninni í öðrum löndum, þar er Bayern Munchen að tapa fyrir liði í 2. deild, United kemst rétt svo í gegnum Coventry. Hér eru Valur og Stjarnan að lenda í vandræðum með Þór og Keflavík. Blikar eru búnir að detta tvisvar úr keppni gegn Keflavík. Þú þarft að klára þessa leiki og það er ótrúlegt hverju við erum búnir að áorka. Ég einhvern veginn skynjaði það í gær að menn vilji ekki að ævintýrið endi,“ sagði Arnar.
Ítarlega var rætt við hann í dag og má sjá viðtalið í heild í spilaranum.
