Edin Terzic hefur heldur óvænt látið af störfum sem stjóri Dortmund. Ástæðan hefur svo komið í ljós, um er að ræða stríð við Mats Hummels.

Í aðdraganda úrslitaleiks Meistaradeildarinnar fór Hummels að gagnrýna þjálfarann.

Þeir eiga svo að hafa rifist harkalega með þeim afleiðingum að annar þeirra þurfti að fara, var það svo að Terzic ákvað að segja upp.

Terzic tók við starfinu fyrir rúmum tveimur árum en hann hafði áður verið bráðabirgðastjóri. Undir hans stjórn var Dortmund nálægt því að vinna þýsku úrvalsdeildina í fyrra og fór í úrslitaleik Meistaradeildarinnar í ár, þar sem liðið tapaði gegn Real Madrid. Tímabilið heima fyrir var hins vegar ekki nógu gott og hafnaði liðið í fimmta sæti.

Terzic er nú orðaður við ensku úrvalsdeildina en einhvers staðar hafði hann verið mátaður við stjórastarfið hjá Manchester United. Það er þó ljóst að ekkert verður af því þar sem Erik ten Hag verður áfram.

Nú er Terzic orðaður við nýliða Leicester, sem enn eru í stjóraleit eftir að Enzo Maresca yfirgaf félagið og tók við Chelsea.