Fjölmiðlamaðurinn geðþekki Valtýr Björn Valtýsson botnar ekki í Age Hareide, þjálfara íslenska karlalandsliðsins, að nota ekki fleiri leikmenn í vináttulandsleiknum gegn Hollandi í gær.

Ísland vann glæstan 0-1 sigur á Englandi fyrir helgi en í gær varð 4-0 tap niðurstaðan gegn Hollandi og ljóst að þreyta var í mannskapnum.

„Við gerum eina breytingu og hann kvartar undan því að menn hafi verið þreyttir, stutt á milli leikja. Þetta er vináttuleikur og þú ert að prófa leikmenn, sem hann gerir ekki í þessum leik. Á sama tíma gera Hollendingar níu breytingar milli leikja. Af hverju notum við ekki fleiri menn?“ segir Valtýr í hlaðvarpi sínu, Mín skoðun.

„Hann sagði það ekki beint en það er eins og hann treysti ekki öllum í hópnum. Hvað er hann að velja þá? Galið.“

Valtýr bendir á leikmenn sem hann hefði getað hugsað sér að sjá í leiknum gegn Hollandi.

„Ónotaðir í þessum leik eru auðvitað markverðirnir, Elías og Patrik, svo er Alfons Sampsted, Guðmundur Þórarinsson, Logi Tómasson og Sævar Atli.“