Sú saga gengur að tíðinda sé að vænta úr herbúðum KR á næstu dögum varðandi þjálfaramál félagsins. Frá þessu segir Hjörvar Hafliðason í Dr. Football.

Gregg Ryder virðist valtur í sessi þrátt fyrir að hafa stýrt KR í aðeins nokkra mánuði, slakt gengi liðsins undanfarið hefur farið illa í stuðningsmenn liðsins.

„Nú er maður alltaf eitthvað að giska, maður fær þetta ekki beint frá kúnni. Það eru einhverjir að henda því inn að það verði fréttir úr Vesturbænum í vikunni, hafið þið eitthvað heyrt?,“ sagði Hjörvar í þætti dagsins.

Jóhann Már Helgason fyrrum framkvæmdarstjóri Vals segir mikla óánægju vera í herbúðum KR.

„Maður hefur heyrt ýmislegt, þrýstingurinn er mikill á aðgerðir innan félagsins. Það er megn óánægja með það hvernig þetta hefur farið af stað.“

„Það eru málsmetandi menn innan KR mjög ósáttir og þá átt sem Ryder hefur farið með liðið, það léttir ekki umræðuna að eitt stykki Óskar Hrafn er á lausu.“

Óskar Hrafn Þorvaldsson er mikið orðaður við starfið en Íslandsmeistarinn, Arnar Sveinn Geirsson efast um að hann taki við.

„Hefur Óskar áhuga? Þetta fittar ekkert inn í hans hugmyndafræði, taka við lið á miðju tímabili, ekki hópur sem hann myndi vilja, lélegur grasvöllur.“