„Það er ógeðslega gott að vinna þetta. Mér fannst við sterkari aðilinn í leiknum og eiga þetta skilið,“ sagði Guðrún Arnardóttir eftir afar mikilvægan 2-1 sigur Íslands á Austurríki í undankeppni EM í kvöld.
Guðrún átti stóran þátt í fyrra marki Íslands sem Hlín Eiríksdóttir skoraði. Átti hún þar frábæran sprett með boltann upp völlinn.
„Ég veit ekki hvað kom yfir mig, þetta er ekki líkt mér. En ég er bara guðslifandi fegin að Hlín hafi klárað þetta svo þetta væri ekki til einskis,“ sagði Guðrún létt í bragði.
Austurríska liðið jafnaði undir lok fyrri hálfleiks en það sló Stelpurnar okkar ekki út af laginu.
„Við mættum inn í seinni hálfleikinn með góða tilfinningu því við vorum alveg með yfirhöndina í leiknum þrátt fyrir að við værum á móti vindi. Þetta var smá blaut tuska en sló okkur ekkert út af laginu.“
Nánar er rætt við Guðrúnu í spilaranum.
