Hákon gekk í raðir enska úrvalsdeildarliðsins Brentford frá Elfsborg í janúar. Hann er ánægður með fyrsta hálfa árið í London.
„Fyrsta mánuðinn var ég bara að koma mér fyrir. Svo var ég bara að æfa mikið og kynnast öllu. Fyrstu mánuðirnir hafa verið mjög góðir. Þetta er toppaðstaða og allt í hæsta klassa,“ sagði Hákon.
Hann segir það hafa verið töluverð viðbrigði að fara frá Elfsborg í Svíþjóð og til Brentford.
„Það er bara allt. Starfsólkið í kringum liðið. Það er hugsað mikið meira um leikmenn, pælt í svo miklu fleiri hlutum. Þetta er bara nokkrum skrefum hærra.“
Var þetta enn stærra en Hákon gerði ráð fyrir?
„Ég vissi ekki hverju ég átti að búast við en þetta var mjög stórt og tók alveg smá tíma að kynnast öllu og læra á hvernig þetta virkaði.“
Hákon hafði vitað í einhvern tíma að hann færi frá Brentford eftir síðustu leiktíð en eftir að Brentford kom inn í myndina í janúar gerðust hlutirnir hratt. Fleiri félög höfðu þó áhuga og þar á meðal Aston Villa.
„Það var eiginlega klárt að ég myndi fara eftir tímabil. Það kláraðist í nóvember og svo fékk ég landsleikinn á móti Portúgal, sem gekk fínt. Svo í desember byrjar þetta aðeins en janúarglugginn er líka allt öðruvísi. Það var alltaf eitthvað að fara að gerast en þetta með Brentford gerðist frekar seint. Það byrjaði mikill áhugi frá Belgíu snemma og líka eitthvað smá í Danmörku. Svo koma Villa og Brentford um miðjan janúar.“
Sem fyrr segir hafði Aston Villa líka áhuga á Hákoni og telur hann að það hefði verið skemmtilegt skref einnig. Brentford heillaði hins vegar meira.
„Já, það var alveg nálægt. Þeir gáfu sér það líka bara að ég myndi koma. Þeir voru ekki að pæla í að það væri einhver svipuð samkeppni á þeirra leveli. Það hefði alveg líka verið fínt skref.
Mér leið einhvern veginn mikið betur með það skref (Brentford). Ég talaði við Thomas Frank (stjóra liðsins) og markmannsþjálfarann. Það var líka styttra í að fá tækifæri og líklegra. Þeir gáfu mér smá plan, nokkurra ára plan, eins og þeir gerðu með Raya (markvörð Arsenal í dag) þegar hann kemur og þeir búa hann til. Honum var bara kastað úr Blackburn. Þeir gáfu mér góða mynd af því sem þeir sáu og mér leist best á það.“
Umræðan í heild er í spilaranum og einnig má hlusta á þættinn hér að neðan, sem og á helstu hlaðvarpsveitum.
