Óvæntar fréttir bárust af því fyrr í þessum mánuði að Óskar hefði sagt upp störfum í gær. Óskar samdi við félagið í október í fyrra en þar áður hafði náð eftirtektarverðum árangri með Breiðablik og meðal annars komið liðinu í riðlakeppni Sambandsdeildarinnar.
Aðeins sex umferðir voru búnar af norsku úrvalsdeildinni og undir stjórn Óskars hafði Haugesund unnið tvo leiki og tapað fjórum.
„Stutta svarið er það að mér fannst við ekki vera að ganga í sömu átt. Mér fannst ég vera að feta annan veg en margir aðrir þarna. Á endanum komst ég bara að þeirri niðurstöðu að það væri best fyrir mig að fara,“ sagði Óskar, spurður út í málið á Stöð 2 Sport í kvöld.
Sagan sem flaug hátt í kringum brotthvarf Óskars frá Noregi var sú að hann og Sancheev Manoharan, aðstoðarmaður hans, næðu ekki saman. Manoharan er nú aðalþjálfari Haugesund. Óskar var spurður að því hvort hann hafi upplifað það að aðstoðarmaðurinn inni gegn honum.
„Já, það var mín tilfinning. Ef þú myndir spyrja hann myndi hann segja eitthvað annað. Þetta er tilfinning á móti tilfinningu. Menn verða bara að bera virðingu fyrir hvernig mér leið og hvaða tilfinningu ég hafði fyrir þessu verkefni á þeim tímapunkti sem ég tók þessa ákvörðun.“
Margir hafa velt því fyrir sér hvað Óskar tekur sér næst fyrir hendur. Hann er sjálfur ekki viss sem stendur.
„Hugurinn er bara alls staðar og hvergi. Það er auðvitað sérstakt að eftir tíu ár sem ég hef verið í verkefni tengdu fótbolta eða á leið í verkefni tengt fótbolta að hafa ekki neitt að gera. Ég er ekki í þeirri aðstöðu að ég ætli að fara að útiloka eitt eða neitt en auðvitað er það þannig að það er mjög gaman að þjálfa fótboltalið og frábært að starfa í fótbolta. Það er draumurinn að hafa það að atvinnu,“ sagði Óskar.
