Hertogaynjan Meghan Markle er þess vafasama heiðurs aðnjótandi að vera gífurlega óvinsæl hjá breskum fjölmiðlum en á sama tíma eitt vinsælasta fréttaefni þeirra. Að þessu sinni eru miðlar að velta sér upp úr meintri græðgi fyrrum leikkonunnar sem er kölluð fordæmalítil og óseðjandi, en það er konunglegi rithöfundurinn Tim Quinn sem er að leggja fram þá kenningu að hertogaynjan sé með peningaglampa í augunum.

„Hún sér ekkert að því að vera ofurrík og verja tíma sínum með þeim ríku og frægu á sama tíma og hún segist einbeita sér að því að hjálpa fátækum og jaðarsettum. Einn fyrrum vinur hjónanna vill meina að Meghan þrái samtímis að vera Marie Antoinette og Móðir Teresa,“ sagði rithöfundurinn í samtali við The Mirror.

Quinn vitnar þar til fyrrum Frakklandsdrottningar, Marie Antoinette sem var síðasta drottning landsins og varð að tákni stéttaskiptingar og auðvaldsins í frönsku byltingunni. Drottningin tapaði eftirminnilega lífinu þegar hún var sakfelld fyrir landráð og hálshöggvin árið 1793. Quinn vitnar svo til dýrlingsins Mary Teresa Bojaxhiu, nunnu sem var þekkt fyrir góðverk sín. Móðir Teresa stofnaði góðgerðasamtök sem opnuðu heimili fyrir HIV-smitaða, berklaveika og fyrir fólk með holdsveiki. Samtökin ráku eins mataraðstoð og hreyfanlegar heilsugæslur svo eitthvað sé nefnt. Hún var sæmd friðarverðlaunum Nóbels árið 1979.

Meghan og eiginmaður hennar, Harry Bretaprins, eru búsett í Bandaríkjunum þar sem þau hafa reynt að byggja upp viðskiptaveldi. Quinn segir að helsti vandi hjónanna sé hversu gráðug Meghan er.

„Vandi Meghan er hvað hún virðist eltast ofstækisfullt við peninga. Þó að hjónin séu verulega efnuð þá finnst Meghan það aldrei nóg því hún býr í nágrenni við ríkari stórstjörnur“

Quinn segir þetta ákveðna hræsni í hertogaynjunni sem opinberlega leitist eftir að vera talskona fátækra og jaðarsettra. Hún tali eins fyrir umhverfinu en ferðast svo með dýru einkaflugi og klæðist hönnunarfatnaði sem flestir geta aðeins látið sig dreyma um að eignast. Rithöfundurinn segir þessa hræsni hafa verið áberandi í ferð hjónanna til Nígeríu á dögunum. Mikil fátækt sé í landinu og því ósmekklegt að hertogaynjan hafi klæðst þar rándýrum fatnaði og skartgripum og auk þess haft tíðari fataskipti en eðlilegt þyki.