Það kemur vel til greina hjá Manchester United að taka Jadon Sancho aftur í sumar og gefa honum annað tækifæri hjá félaginu.

Eftir erfiða tíma hjá United og deilur við Erik ten Hag var Sancho lánaður til Dortmund í janúar.

Þar hefur kantmaðurinn knái fundið takt sinn og gengið vel hjá félaginu sem hann var hjá áður.

„Við fylgjumst vel með, við erum að fara á leikina hans og sjá hvernig Jadon stendur sig,“ segir Erik Ten Hag í dag.

Ummæli hans vekja athygli en Ten Hag bannaði Sancho að æfa með liðinu eftir rifrildi þeirra í byrjun september.

„Við höfum heimsótt hann og rætt við hann, við höldum því áfram.“

John Murtough fyrrum yfirmaður knattspyrnumála hjá United og Matt Hargreaves sem semur við leikmenn hafa heimsótt Sancho.

Ensk blöð segja að endurkoma hans til United sé í kortunum en endaleg ákvörðun verði þó tekin í sumar.