Stuðningsmenn Liverpool gætu fljótt orðið þreyttir á Hollendingnum Arne Slot sem mun taka við liðinu í sumar.

Þetta segir Ryan Babel, fyrrum leikmaður liðsins, en hann er hollenskur og þekkir vel til Slot sem er í dag stjóri Feyenoord.

Það er mikil pressa á Slot sem tekur við af Jurgen Klopp sem hefur undanfarin níu ár gert flotta hluti á Anfield.

Babel telur að pressan verði mikil á Slot til að byrja með og ef gengið er ekki ásættanlegt í byrjun gæti fólk misst þolinmæðina snögglega.

,,Erik ten Hag gerði mjög vel hjá Ajax, hann var með leikmenn sem gátu spilað eftir hans hugmyndafræði og það lét hann líta vel út sem þjálfara,“ sagði Babel.

,,Nú er hann hjá Manchester United sem er einnig stórt félag en af einhverjum ástæðum hefur það verkefni ekki gengið upp og fólk efast um hvort hann sé góður stjóri eða ekki.“

,,Nýir þjálfarar þurfa alltaf tíma en spurningin er hversu mikinn tíma fær Slot? Liverpool hefur alltaf verið heppið að vera með Klopp við stjórnvölin og hans hugmyndafræði.“

,,Ég er nokkuð viss um að ef gengið verður ekki eins þá verða menn pirraðir mjög, mjög fljótlega.“