Axel Óskar Andrésson, varnarmaður KR, var gestur í nýjasta þætti af Íþróttavikunni. Helgi Fannar Sigurðsson og Hrafnkell Freyr Ágústsson hafa umsjón með þættinum.
Axel gekk í raðir KR frá sænska B-deildarliðinu Örebro fyrir tímabil. Hann hafði verið í Svíþjóð síðan 2022 en hlutirnir voru farnir að súrna undir lokin.
„Ég er ótrúlega jákvæður gæi og reyni alltaf að sjá jákvæðu hliðarnar á hlutunum. En þetta var orðið þannig að maður var að fara í leiki vitandi að við værum ekki að fara að gera mikið. Það tekur á til lengri tíma að fara þannig inn í leiki,“ sagði hann.
Axel horfir þó með hlýju til baka á tímann hjá Örebro.
„Þetta er geggjaður klúbbur með góða stuðningsmenn, flottan völl og allt. En þegar ég fékk tækifærið á að fara þá tók ég það.“
Umræðan í heild er í spilaranum.
Íþróttavikan er í boði Bola léttöl og Lengjunnar