Oleksandr Syrskyi, æðsti yfirmaður úkraínska hersins, ræddi gang stríðsins nýlega við blaðamann úkraínsku fréttastofunnar Ukrinform. Hann sagði meðal annars að í febrúar og mars hafi Úkraínumönnum tekist að veita Rússum þung högg og hafi valdið þeim miklu tjóni á búnaði auk mikils mannfalls.

Ef það sem hann sagði er rétt, þá er ljóst að febrúar og mars voru Rússum dýrkeyptir mánuðir. Syrskyi sagði að Rússar hafi misst rúmlega 570 skriðdreka, um 1.430 brynvarin ökutæki og um 1.680 fallbyssur auk 64 loftvarnarkerfa.

Hann sagði einnig að úkraínskar hersveitir séu enn með mikilvægar hæðir og varnarlínur við fremstu víglínu á sínu valdi. Markmiðið sé að koma í veg fyrir að Rússar nái meira landsvæði á sitt vald, þreyta þá eins mikið og hægt er og valda þeim eins miklu tjóni og hægt er og um leið undirbúa úkraínskar varaliðssveitir fyrir sóknaraðgerðir.