Breiðablik fékk tilboð frá liði FC Tobol frá Kasakstan fyrr á þessu ári en boðið var í sóknarmanninn Kristófer Inga Kristinsson.
Kristófer er 24 ára gamall og hefur spilað með Blikum síðan í fyrra en var fyrir það atvinnumaður.
Framherjinn lék áður með Willem, Grenoble, PSV, Donserjyske og VVV-Venlo í atvinnumennsku.
Ljóst er að laun Kristófers hefðu hækkað verulega ef tilboðið hefði verið samþykkt en rætt var stuttlega um ástæðu höfnunarinnar í sjónvarpsþætti 433, Íþróttavikunni.
Helgi Fannar Sigurðsson, Hrafnkell Freyr Ágústsson og Halldór Garðar Hermannsson ræddu saman að þessu sinni.
Hrafnkell er mikill stuðningsmaður Breiðabliks og hafði þetta að segja um hvað átti sér stað á milli félaganna.
,,Ég heyrði að félögin hafi ekki náð saman á endanum, það var eitthvað með uppsettninguna á greiðslum og fleira,“ sagði Hrafnkell.
,,Hann hefði getað keypt sér skuldlausa íbúð.“
