Gunnar heldur utan um hópinn og eru meðlimir hans nú tæplega 22 þúsund talsins. Í færslu Gunnars í hópnum í gærkvöldi greindi hann frá því að hann hafi verið að taka til í hópnum; svara skilaboðum, eyða færslum og blokka einstaklinga.
„Ef þið rekist á eitthvað sem flokkast undir niðurrif, hatursorðræðu eða almenn leiðindi megið þið einfaldlega kæra það til mín. Ekkert mál. Þannig verð ég fljótari að finna þetta rugl. Hinsvegar! Svörin ykkar eru í sumum tilfellum svo skemmtileg að ég á bara erfitt með að taka út þær færslur sem svörin eiga við um,“ sagði hann í færslunni.
Gunnar segir að þegar hann opnaði síðuna hafi nokkrir komið í hópinn með þann eina tilgang að vera með leiðindi. Hreinsaði hann það fólk í burtu en eftir tilkynningu Baldurs um forsetaframboð á miðvikudag hafi um þrjú þúsund manns bæst við hópinn og þar inni á milli leynast tröll.
„Meira að segja fyrrum þingmenn sem hafa greinilega ekkert betra að gera en að mæta hér með stæla og leiðindi. Burt með þá,“ sagði Gunnar sem nefnir þó engin nöfn í þessu samhengi. Þá hvetur hann fólk til að tala af virðingu um aðra frambjóðendur.
„OG MUNIÐ! Ekki eitt styggðaryrði um Höllu eða aðra frambjóðendur. Ef við viljum ekki skít um okkar menn þá köstum við ekki skít í aðra. Og ALLS EKKI í Guðna forseta (hef reyndar bara fundið eitt leiðindakomment um hann)(en það er einu of mikið.)“
Gunnar sendir líka skýr skilaboð til þeirra sem eru nýir í hópnum og halda að hópurinn sé vettvangur fyrir skoðanaskipti.
„Ég er stjórnandi síðunnar. Ég fór af stað með þá stefnu að leyfa öllum að tjá sig í trausti þess að fólk væri kurteist og skildi eðli síðunnar, sem er að hún er fyrir stuðningsfólk Baldurs. En þegar dónaskapurinn gekk fram af fólki breytti ég stefnunni og tek hiklaust út allt sem er ekki málefnalegt. Það má segja að ég hafi haldið opið boð heima hjá mér. Opið hús, skiljið þið, til heiðurs Baldri og Felix. En ef gestir á opna húsinu valsa inn á drullugum skónum og fara að vera með leiðindi við heiðursgestina og aðra er þeim einfaldlega vísað í burtu.“
