Helgi Fannar Sigurðsson skrifar frá Búdapest
Hjörtur Hermannsson fer ekki í felur með það að hann sé ósáttur með spiltíma sinn hjá ítalska B-deildarliðinu Pisa. Hann ræddi við 433.is á hóteli íslenska landsliðsins í Búdapest, en liðið undirbýr sig fyrir leik gegn Ísrael í umspili um sæti á EM.
Hjörtur gekk í raðir Pisa árið 2021 en undanfarið hefur hann verið í aukahlutverki.
„Það er engin óskastaða fyrir mig að vera ekki að fá eins margar mínútur og mér finnst ég skilið að fá og myndi vilja. En þjálfarinn þarf að velja ellefu leikmenn inn á og ég hef því miður þurft að bíta í það súra epli að vera oftar ekki á meðal þeirra,“ sagði Hjörtur.
Hann mun hugsa sér til hreyfings í sumar ef staðan breytist ekki.
„Ég held að það gefi auga leið að ef staðan verður svona áfram þurfi maður að líta í kringum sig. Ég ætla ekki að vera að hugsa of mikið um það núna en fótboltinn virkar bara þannig að maður vill spila sem mest og vera þar sem maður er metinn að verðleikum.“
Ítarlegra viðtal við Hjört er í spilaranum.
