Það voru margir steinhissa á að markvörðurinn Rúnar Alex Rúnarsson væri ekki í landsliðshópi Íslands fyrir komandi leik gegn Ísrael. Age Hareide landsliðsþjálfari var spurður út í þessa ákvörðun sína á blaðamannafundi í dag.
Rúnar gekk í raðir FC Kaupmannahafnar frá Arsenal í janúar. Hann hafði verið á láni hjá Cardiff frá enska stórliðinu fyrir áramót.
„Rúnar hefur ekki spilað nóg. Hann hefur ekkert spilað með FCK og spilaði lítið með Cardiff,“ sagði Hareide á blaðamannafundi í dag.
„Ég sagði honum að hann þyrfti að spila og vonandi verður hann aðalmarkvörður FCK í sumar.“
Patrik Sigurður Gunnarsson var valinn í hópinn, ásamt Hákoni Rafni Valdimarssyni og Elíasi Rafni Ólafssyni.
„Við erum heppnir að eiga fjóra góða markverði. Patrik hefur staðið sig vel og ég treysti honum.“
