Eva Bryndís Helgadóttir, lögmaður konunnar sem kærði Albert Guðmundsson síðasta haust segir að ekki hafi verið tekin ákvörðun um hvort niðurstöðu ákæruvaldsins verði áfrýjað.
Konan kærði Albert fyrir kynferðisbrot síðasta haust en landsliðsmaðurinn í knattspyrnu hefur hafnað allri sök í málinu.
Lögregla hafði rannsakað málið sem fór á borð ákærusviðs sem ákvað að fella það niður, var það ekki talið líklegt til sakfellingar miðað við niðurstöðuna.
Eva segir í svari við fyrirspurn að ekki sé búið að ákveða hvort þeirri ákvörðun verði áfrýjað.
„Það liggur ekki fyrir ákvörðun um það. Fresturinn til þess er út 22.mars nk,“ segir Eva Bryndís í skriflegu svari við fyrirspurn 433.is.
Albert hefur ekki mátt vera í íslenska landsliðshópnum vegna málsins samkvæmt reglum KSÍ, hins vegar er búist við að hann snúi aftur þegar Age Hareide kynnir nýjan landsliðshóp á föstudag.
Íslenska landsliðið er á leið í umspil um sæti á Evrópumótinu næsta sumar. Ákveði konan að áfrýja niðurstöðunni yrði Hareide hins vegar áfram bannað að velja Albert, miðað við regluverk sambandsins.
Ísland mætir Ísrael 21 mars og vinni liðið sigur þar fer liðið i úrslitaleik gegn Bosníu eða Úkraínu sem mætast í hinum leiknum.
