Kjartan Henry Finnbogason var gestur Íþróttavikunnar sem kemur út alla föstudaga. Helgi Fannar Sigurðsson og Hrafnkell Freyr Ágústsson hafa umsjón með þættinum.

Kjartan lagði skóna á hilluna í haust eftir glæstan feril hér heima og erlendis. Tók hann við sem aðstoðarþjálfari Heimis Guðjónssonar hjá FH.

„Þetta hefur verið ótrúlega skemmtilegt. Þetta er auðvitað stórt skref, að taka þá ákvörðun að hætta að spila og líkamlega hefði ég alveg getað haldið áfram en þegar svona tækifæri koma upp þá er gott að fá einhvern annan til að taka svona ákvörðun fyrir sig. Ég er hrikalega ánægður og stoltur að fá að vera í svona starfi hjá svona stórum og flottum klúbi,“ segir Kjartan um nýja starfið.

„Ég var ekki að mikla þetta neitt fyrir mér. Ég var ekki að hugsa um að leikurinn á móti KR í haust væri minn síðasti leikur. Það var ekki neitt svoleiðis drama.“

Kjartan segir frábært að starfa með Heimi.

„Hann er auðvitað algjör goðsögn og mjög sigursæll þjálfari. En hann er tilbúinn til að hlusta og ég finn það að okkar samband er að verða betra og betra.

Fyrstu dagana hugsaði ég: Hvað er ég búin að koma mér út í? En blessunarlega fór Heimir á þetta handboltamót í Munchen svo ég var einn með strákana í átta daga og þurfti aðeins að finna mig, hugsa virkilega mikið og undirbúa mig vel. Ég held það hafi gert mér rosalega gott.“

Umræðan í heild er hér að neðan.

Íþróttavikan er í boði Bola léttöl og Lengjunnar.