Íþróttavikan var á sínum stað þessa vikuna en Þorkell Máni Pétursson var gestur þáttarins. Máni er í framboði til stjórnar KSÍ.

Helgi Fannar Sigurðsson og Hrafnkell Freyr Sigurðsson stýrðu þættinum en rætt var um málefni KSÍ og ÍTF.

Mörgum hjá KSÍ finnst óeðlilegt að ÍTF hafi mann í stjórn KSÍ en Mána finnst það ekki. „Ég get ekki séð neitt annað, mér finnst eðlilegt að þau séu með mann í stjórninni. Ég held að þeir séu með rétt til að sitja fundina en ekki ákvörðunarrétt, það eru átta heil sæti í stjórn og það er ekkert verra að vera með fleiri hendur á borði,“ segir Máni.

„Það er ekkert stirt, ÍTF er nýtt af nálinni og þetta tekur smá tíma. Það hljómar eins og þvílíkt stríð, margir ÍTF menn hafa gaman af átökum en það er ekkert illa meint.“

Máni segir bara eðlilegt að tekist sé á um það hvernig KSÍ notar peningana sína.

„Það er eðlilegt að menn takist á um peninga, það er eðlilegt að félögin vilji meira til sín. Spurningin er hvort er hvar þú eigir að skera niður eða hvort þú getir aukið tekjurnar.“