HS Veitur sendu fyrir um hálfri klukkustund viðvörun á Facebook síðu sinni um að of mikið álag væri á sumum svæðum í rafveitukerfinu á Suðurnesjum og rafmagn byrjað að slá út.

Skilaboð til íbúa um að spara rafmagn voru ítrekuð en það dugði ekki til og er nú rafmagnslaust í Innri Njarðvík og á fleiri svæðum í rafveitukerfinu unnið er að því að koma rafmagni á aftur.

Í færslu HS Veitna er það ítrekað að heita vatnið þurfi rafmagn til að skila sér í hús. Of mikið álag á kerfið hafi þær afleiðingar að dreifing heits vatns tefst. Þess vegna sé nauðsynlegt að þau sem eru að nota meira en þau 2,5 kílówött sem kerfið þolir dragi úr rafmagnsnotkun strax.

Sigrún Inga Ævarsdóttir samskiptastjóri HS Veitna hvatti til þess í samtali við RÚV að fólk slökkti á rafmagnsofnum á meðan eldavélar væru í gangi og létu það vera að hlaða rafmangsbíla á meðan þetta ástand varir.

Auk Innri Njarðvíkur er rafmagnslaust í hluta Voga, hluta Keflavíkur og hluta Suðurnesjabæjar.