Theodór Elmar Bjarnason, fyrrum landsliðsmaður og leikmaður KR, var gestur í nýjasta þætti Íþróttavikunnar. Helgi Fannar Sigurðsson og Hrafnkell Freyr Ágústsson hafa umsjón með þættinum, sem kemur út alla föstudaga á 433.is, Hringbraut.is og í Sjónvarpi Símans.

Aðstaðan hjá KR hefur lengi verið í umræðunni en löngu er kominn tími á að hún verði bætt.

„Það er ekkert sérstaklega gaman að mæta í hvert einasta hverfi sem er með frábært knatthús og svo verum við að þjösnast á þessum eina velli og deila honum með nokkrum flokkum.

Að því sögðu er þetta ekkert hræðilegt. En að sjálfsögðu viljum við hafa þetta betra og nú þegar Fylkismaðurinn er farinn úr Borgarstjórastólnum verður þetta vonandi rifið í gang,“ sagði Elmar léttur í bragði.

KR-inga eru þó farnir að æfa fyrr á daginn nokkrum sinnum í viku, eins og tíðkast í atvinnumennsku erlendis.

„Við erum þrisvar í viku í hádeginu og ég held að stefnan sé að vera alla daga í hádeginu. Þá erum við með líkamsræktarsalinn út af fyrir okkur og völlinn. Það er stórt skref ef við náum því í gegn en það þarf að taka tillit til þess að menn eru í vinnum og við sem erum með börn erum ekkert endilega komnir inn á leikskóla með þau. Það er ekkert sérlega gaman að þurfa að mæta með þau á æfingar,“ sagði Elmar.

Umræðan í heild er í spilaranum.