Wolves og Mancester United mættust í mögnuðum leik í ensku úrvalsdeildinni í kvöld.
Gestirnir frá Manchester komust yfir strax á fimmtu mínútu með marki Marcus Rashford, sem var óvænt í byrjunarliðinu.
Rasmus Hojlund kom United í 0-2 og þannig var staðan í hálfleik. Það stefndi í þægilegan dag á skrifstofunni fyrir lærisveina Erik ten Hag.
Þegar um tuttugu mínútur lifðu leiks fengu Úlfarnir vítaspyrnu og fór Pablo Sarabia á punktinn og skoraði. Líflína fyrir heimamenn.
Skömmu síðar kom Scott McTominay United hins vegar í 1-3.
Úlfarnir höfðu þó ekki sungið sitt síðasta því Max Kilman minnkaði muninn á 85. mínútu. Pedro Neto jafnaði svo á fimmtu mínútu uppbótartíma og leikmenn United nöguðu sig í handarbökin yfir að hafa ekki gert út um leikinn fyrr.
Skömmu síðar varð hins vegar hinn 18 ára gamli Kobbie Mainoo hetja kvöldsins er hann skoraði sigurmark United. Það gerði hann með frábærri afgreiðslu.
Lokatölur 3-4 fyrir United. Liðið er komið upp í sjöunda sæti deildarinnar með 35 stig. Wolves er í því ellefta með 29 stig.
