Erik Ten Hag stjóri Manchester United hefur þurft að taka ítrekað á vandamálum leikmanna utan vallar, nýjasta dæmið er Marcus Rashford sem fékk tveggja vikna sekt fyrir hegðun sína.

Rashford var ekki valinn í leikmannahóp United gegn Newport í enska bikarnum á sunnudag þar sem hann hringdi sig inn veikan á æfingu á föstudag og síðar kom í ljós að hann hafði verið á næturklúbbi í Belfast kvöldið áður.

Þetta er ekki í fyrsta sinn sem Ten Hag þarf að svara fyrir hegðun leikmanna. Jadon Sancho fór síðasta haust í stríð við stjórann og neitaði að biðjast afsökunar.

Ten Hag hefur svo þurft að eiga við vandamál Antony sem er sakaður um ítrekað ofbeldi gegn unnustum sínum. Hann fékk Cristiano Ronaldo í andlitið og félagið rifti samningi við Ronaldo eftir stríð við Ten Hag.

Það er svo einnig málefni Mason Greenwood en félagið vildi ekki spila framherjanum eftir að lögregla felldi niður rannsókn á honum en hann var sakaður um hrottalegt ofbeldi í nánu sambandi.

„Hver annar þarf að takast á við svona vandamál?,“ segir Rio Ferdinand, fyrrum leikmaður félagsins.

„Þetta eru endalausar sögur, þetta eru stórir karakterar sem virðast bara gera það sem þeir vilja.“

„Við erum alltaf að ræða um Ten Hag sem er að takast á við öll þessi vandamál. Við erum stærsta félag í heimi, hann leyfir leikmönnum ekki að komast upp með þetta og ég kann að meta það.“

„Getur stjórinn treyst leikmönnum? Það eru endalausar fréttir á forsíðum um þá, hann getur ekki treyst þeim.“