Eftir tæpa tvo mánuði mun íslenska landsliðið mæta Ísrael í umspili um laust sæti á Evrópumótið næsta sumar, fari svo að íslenska liðið vinni þann leik spilar liðið úrslitaleik gegn Úkraínu eða Bosníu um farmiða á mótið.
Tveir bestu landsliðsmenn sögunnar, Aron Einar Gunnarsson og Gylfi Þór Sigurðsson eru í kappi við tímann. Báðir eru þeir frá vegna meiðsla þessa dagana.
Þá er Gylfi Þór án félags eftir að hafa rift samningi við Lyngby í Danmörku og þá hefur Aron Einar ekki spilað með Al-Arabi frá því í apríl og er ekki skráður í leikmannahóp liðsins.
Rætt var um þetta mál í Dr. Football í gær. „Gylfi Sig og Aron Einar, maður sá fyrir sér að þeir myndu spila þessa leiki, það er orðið tæpt. Þeir eru nánast búnir að spila engan fótbolta í langan tíma, maður er farinn að sjá að þetta er erfitt með þá,“ sagði Hjörvar Hafliðason, stjórnandi Dr. Football.
Hrafnkell Freyr Ágústsson bætti þessu við.„Aron Einar er ekki kominn með nýtt lið, hann er ennþá meiddur og Gylfi er meiddur. Ég er farinn að horfa á Kristian Hlynsson, aðalmaðurinn í Ajax. Við getum startað honum.“
Age Hareide hefur reynt að leggja áherslu á að koma þessum lykilmönnum í gang. „Age sagði það í október þegar Gylfi slær metið að þá sagði hann að lykilatriði væri að koma þeim inn í þetta fyrir umspilið, byggja þessa leiki í kringum þá Gulla, Sverri og Jóa. Svo nýja kjarnanum, það er ekki að fara að gerast,“ sagði Jóhann Már Helgason.
