,,Framkvæmdastjóri Ölmu leigufélags segir það vera bæði ósanngjarnt og óheiðarlegt að halda því fram að félagið hafi ekki lagt sitt af mörkum til að standa með og styðja við íbúa Grindavíkur,”
segir Ragnar Þór Ingólfsson formaður VR.
Ragnar Þór segir þessi orð ekki standast í ljósi þess að Alma leigufélag hafi sent öllum leigjendum sínum í Grindavík greiðsluseðil fyrir janúarmánuð. „Og segja ekki koma til greina að gefa þær greiðslur eftir, sem samskipti Ölmu við leigjendur staðfesta.“
„Leigufélagið Alma þverneitaði að losa fimm manna fjölskyldu úr Grindavík undan leigusamningi eftir að henni bauðst stærri og hentugri íbúð. Þegar vakin var athygli á málinu opinberlega skiptu stjórnendur félagsins um skoðun og ákváðu að gefa eftir,“ segir Ragnar Þór.
Vísar hann þar til máls Rebekku Saidy og fjölskyldu hennar sem DV greindi fyrst frá í gær. Rebekka greindi frá því að hún hefði óskað eftir að losna undan leigusamningi við Ölmu leigufélag þar sem fjölskyldunni bauðst stærri og hentugri íbúð, en fékk þvert nei sem svar. Rúmlega þremur klukkustundum eftir að frétt DV birtist greindi Rebekka frá að henni hefði borist svar frá leigufélaginu þar sem henni var boðið að skila íbúðinni þegar henni hentaði. Var þess einnig farið á leit að hún myndi taka út færslu sína á Facebook um málið.
„Meintur stuðningur eigenda Ölmu til Grindvíkinga nær ekki lengra en það að ekkert fæst í gegn nema vakin sé athygli á því opinberlega og sú umræða sé nægilega neikvæð. Það hlýtur að vera einhver sérstakur staður fyrir fólk sem hagar sér ítrekað með þessum hætti eftir að jarðvist þess lýkur.“
