Bolli Már Bjarnason er gestur í nýjasta þætti Íþróttavikunnar, sem kemur út á föstudögum á 433.is, Hringbraut.is og undir hlekk Hringbrautar í Sjónvarpi Símans. Helgi Fannar Sigurðsson og Hrafnkell Freyr Ágústsson hafa umsjón með þættinum.

Arnar Grétarsson mætti í sjónvarpsþáttinn 433.is á dögunum og ræddi þróun hér heima er varðar peninga í fótboltanum og laun.

„Svo er það að gerast að menn eru að keyra hlutina svolítið upp. Það er kannski skrýtið að Valsmenn séu að kvarta og kveina. Auðvitað viljum við reyna að hækka rána en það þarf að vera innan skynsamlegra marka. Ég tel deildin ekki bera það nema við gerum risa auglýsinga- og sjónvarpssamninga, sem eru ekki í boði. Það eru ekki að koma fleiri þúsundir á völlinn svo tekjuhliðin er ekki stór. Þá ertu með óreglulegar tekjur sem eru Evrópukeppni og að selja leikmenn. Það er bæði „gamble.“ Ef menn ætla að stóla á þetta erum við á hálum ís,“ sagði Arnar í viðtalinu.

Hrafnkell tekur undir hvert orð.

„Ég er 100 prósent sammála þessu. Maður er að heyra að leikmenn séu að fá á bilinu eina til eina og hálfa milljón. Úti er launakostnaður aldrei meiri en 70%. Hérna heima er hann 90-95% af batteríinu og það er bara alltof mikið. Þú getur á endanum keyrt þetta í algjört þrot, eins og lið hafa gert.“

Umræðan í heild er í spilaranum.