Æðstu menn hjá Manchester United munu brátt funda um framtíð Mason Greenwood, leikmanns félagsins sem er á láni hjá Getafe. The Athletic segir frá þessu.

Greenwood hefur spilað afar vel með Getafe fyrri hluta tímabils og hefur það vakið áhuga stærri félaga. Barcelona og Atletico Madrid hafa bæði áhuga á honum miðað við fréttir.

Englendingurinn ungi er ekki talinn eiga framtíð hjá United, en í byrjun þessa árs voru mál gegn honum látin niður falla. Hann var sakaður um gróft ofbeldi gegn kærustu sinni – og nú barnsmóður – Harriet Robson. Málið var látið niður falla í kjölfar þess að lykilvitni dró sig til hlés.

United vill þó fá pening í kassann fyrir Greenwood en talið er að Börsungar séu til í að borga 40 milljónir evra til að mynda. Sá möguleiki er því nefndur til sögunnar að enska félagið kalli sóknarmanninn til baka í glugganum í þessum mánuði og fari í viðræður við félög sem vilja kaupa hann.

Líklegri niðurstaða er þó sú að Greenwood klári tímabilið með Getafe og verði svo seldur annað, en samningur hans við United rennur út eftir næstu leiktíð.