Frans páfi hefur undirritað plagg sem heimilar kaþólskum prestum að leggja blessun sína yfir samkynja pör. Segir hins vegar að ekki sé um eiginlega hjónavígslu að ræða.

Fréttastofan AP greinir frá þessu.

Páfi hafði ýjað að breytingunum í október. Það eð að hægt sé að blessa samkynja fólk án þess að ganga gegn kennisetningum Biblíunnar. En kaþólska kirkjan hefur alltaf haft þá afstöðu að hjónaband sé aðeins á milli karls og konu. Breytingin nú er því nokkuð róttæk.

Í nýju plaggi sem páfi hefur nú undirritað segir að fólk sem leitast eftir ást guðs og miskunn eigi ekki að þurfa að undirgangast ítarlega siðferðislega athugun áður en það fær hana.

Ekki sömu aðferðir og við giftingar

Í plagginu segir hins vegar að hjónabandið sé heilagt sakramenti karls og konu sem varir út lífið. Einnig að kaþólskir prestar eigi ekki að veita samkynja fólki blessun á sama tíma og það gengur í staðfesta samvist hjá sýslumanni. Einnig að prestar ættu ekki að klæðast sama fatnaði og nota sömu aðferðir við að blessa samkynja fólk og þeir nota við giftingar.

Blessun samkynja para sé hins vegar ekki bönnuð.

„Blessanir auka möguleika fólks á að treysta bönd sín við guð. Beiðni um blessun nærir nálægðina við guð þúsundfalt í ákveðnum kringumstæðum lífsins, sem er ekkert smáræði í þessum heimi í dag,“ segir í plagginu. „Þetta er fræ hins heilaga anda sem verður að vera hlúð að, ekki hindrað.“