Pálmi, sem er tvítugur, kemur frá Wolves, en hann spilaði með varaliðinu þar. Skiptin til Víkings áttu sér nokkurn aðdraganda.
„Þetta eru búnir að vera nokkrir mánuðir af því að spjalla og ræða málin, fá leyfi frá mönnum í Wolves. Þeir voru fyrst ekkert hæstánægðir að leyfa mér að fara. Það þurfti mikið til að sannfæra þá. Ég heyrði fyrst af þessu í sumar og er búinn að vera spenntur fyrir þessu síðan. Það var bara ekki rétti tíminn að fara í sumar á miðju tímabili hér á Íslandi. En ég var frekur og sagði Wolves að ég vildi fara í Víking og þeir gátu ekki sagt nei því þeir gátu ekki boðið neitt betra,“ sagði Pálmi við 433.is eftir undirskrift í dag.
Pálmi segist hafa öðlast góða reynslu hjá Wolves.
„Þetta er ótrúlega flottur bolti. Við höfum verið að spila í efstu deild (Premier League 2) síðustu þrjú árin. Við vorum að spila á móti bestu leikmönnunum á þessum aldri á Englandi. Þetta er geggjuð deild að spila í en mig langaði að spila meistaraflokksbolta.“
Pálmi ætlar sér að veita Ingvari Jónssyni alvöru samkeppni um stöðu aðalmarkvarðar í Víkinni.
„Heldur betur. Ég er nútíma markvörður og Víkingur spilar sama kerfi og ég var í hjá Wolves. Þannig ég tel mig vera að koma inn í stöðu sem ég er mjög vanur að spila.“
Eins og flestir vita hefur Arnar Gunnlaugsson, þjálfari Víkings, verið sterklega orðaður við Norrköping undanfarið. Var Pálmi eitthvað að spá í því áður en hann skrifaði undir?
„Það er ekki bara Arnar sem vill fá mig. Ég er mest búinn að spjalla við Kára. Ég veit að ef það kemur nýr þjálfari verður spilað sama kerfi því það sem þeir eru að gera virkar. Ég veit líka að Kári fílar mig í tætlur svo það er ekkert stress. En auðvitað vil ég vinna með Arnari, þetta er toppmaður og toppþjálfari. Vonandi verður hann hér í eitt ár í viðbót en hann á auðvitað að vera úti að þjálfa,“ sagði Pálmi, en viðtalið í heild er í spilaranum.
