Graham Potter er í dag orðaður við stjórastarfið hjá Manchester United í enskum miðlum.
Sæti Erik ten Hag, núverandi stjóra United, er ansi heitt en liðinu hefur gengið illa í ensku úrvalsdeildinni það sem af er leiktíð og endaði þá á botni síns riðils í Meistaradeild Evrópu.
Sir Jim Ratcliffe mun á næstu dögum eignast 25% hlut í United og tekur hann yfir stjórn á fótboltahlið félagsins. Sagt er að hann hafi þegar hitt Potter og rætt við hann um að taka við ef Ten Hag fer.
Ummæli Potter frá tíma sínum hjá Chelsea hafa verið rifjuð upp í ljósi þess að nú er hann orðaður við United. Þá hrósaði hann fjórum leikmönnum sérstaklega.
„Þeir eru með hættulega leikmenn eins og Rashford, Antony, Sancho og Bruno Fernandes sem eru gríðarlega mikilvægir. Þeir hafa vanist því að spila með hvorum öðrum,“ sagði Potter á síðustu leiktíð.
Það er spurning hvort leikmaður eins og Jadon Sancho ætti afturkvæmt undir stjórn Potter en hann er algjörlega í frystikistunni hjá Ten Hag.
Potter hefur verið án starfs síðan í apríl. Á dögunum hafnaði hann því að taka við Stoke í ensku B-deildinni. Er hann aðeins til í að snúa aftur til starfa fyrir stórlið.
