Manchester United er úr leik í Meistaradeild Evrópu en liðið komst ekki upp úr riðlakeppninni.
Þetta varð ljóst í gær en liðið tapaði 0-1 gegn Bayern Munchen. Þurfti það að treysta á jafntefli í leik FCK og Galatasaray og vinna Bayern en Danirnir unnu sinn leik og sigur hefði því ekki dugað lærisveinum Erik ten Hag.
Hollendingurinn var þó nokkuð brattur eftir leik.
„Við klúðruðum riðlakeppninni ekki í dag. Við sýndum góða frammistöðu en gerðum nokkur mistök. Þetta var ekki nógu gott þegar alltkemur til alls en mér fannst liðið standa sig mjög vel. Við áttum ekki skilið að tapa,“ sagði hann.
„Ég verð að hrósa liðinu fyrir hvernig það spilaði gegn mjög góðu Bayern liði.“
Stuðningsmenn United voru margir hverjir ekki hrifnir af þessum ummælum.
„Jesús, hvað er hann að horfa á?“ skrifaði einn netverji en athygli var vakin á þeim í enskum miðlum.
„Hvað í andskotanum var ég að lesa? Hann er búinn að tapa sér. Að hann telji þetta gott sýnir á hvaða stað við erum,“ skrifaði annar.