Stjórn KSÍ hefur ákveðið að fara fram á það að umspilsleikur kvennalandsliðsins í febrúar fari fram erlendis. Er þetta gert þrátt fyrir að fjöldi leikvanga hér á landi séu löglegir í leikinn.

UEFA gerir aðeins kröfu á „Category 4“ völl í þetta verkefni sem Þjóðadeild kvenna er, þrátt fyrir að Laugardalsvöllur sé óleikhæfur mætti spila á Hlíðarenda, Kópavogsvelli og á fleiri stöðum.

Mörgum þykir það furðulegt að sambandið fari í þá vegferð að fara með leikinn úr landi, þegar þess þarf ekki.

Þessi umræða hefur verið í loftinu og kom einnig upp í kringum mögulega karlalandsleiki, UEFA gerir hins vegar miklu meiri kröfur til vallarmála þar en í Þjóðadeild kvenna.

Geir Þorsteinsson, fyrrum formaður KSí botnar hvorki upp né niður í því að sambandið ætli með leikinn úr landi þegar þess þarf ekki. „Þetta er ótrúlegt, sjálfstætt knattspyrnusamband fulltrúi sjálfstæðrar þjóðar, hvers vegna að láta frá sér heimaleik sem Íslendingar eiga rétt á?,“ segir Geir í ummælum á Facebook síður Sigurðar Helgasonar sem vakti athygli á málin.

Geir segir að fjöldi leikja fari fram utandyra í lok febrúar á Íslandi. „Þessa viku (í lok febrúar / byrjun mars 2024) munu væntanlega fara fram tugir leikja utandyra í knattspyrnu í mótum m.a. á vegum KSÍ. Vitanlega getur veður haft áhrif og getur reyndar gert það alla mánuði ársins á Íslandi. Draumur um nýjan leikvang verður að veruleika en meðan beðið er verðum við að gera það besta úr stöðunni. Nei, leikurinn hlýtur að fara fram á Íslandi, annað er uppgjöf.“