Antoine Griezmann, leikmaður Atletico Madrid, er nokkuð viss um af hverju Joao Felix náði ekki að sýna sínar bestu hliðar hjá félaginu.

Felix var fenginn til Atletico árið 2019 frá Benfica en samband hans og Diego Simeone, stjóra liðsins, hefur ekki verið gott í dágóðan tíma.

Felix spilar í dag fyrir Barcelona á Spáni en hann var líka lánaður til Chelsea á síðustu leiktíð.

Atletico hefur lengi spilað ansi varnarsinnaðan bolta sem hentaði ekki stráknum frá Portúgal og segir Griezmann að Felix hafi að lokum fengið nóg af leikstíl liðsins.

,,Þegar þú kemur hingað þá veistu í raun hvernig þjálfarinn er, hvernig liðið er, þú verður að aðlagast því og ef ekki þá munu hlutirnir ekki ganga upp,“ sagði Griezmann.

,,Þú þarft að vera í sama gæðaflokki allan tímann en það kom tími þar sem hann varð þreyttur, hann sá sjálfan sig ekki hér og vildi leita í annan möguleika.“