Í gær var greint frá því að fjöldi tilfella í Warren-sýslu í Ohio í Bandaríkjunum væru orðin það mörg að hægt væri að tala um faraldur. Hafa 142 tilfelli greinst í sýslunni síðan í ágústmánuði. Í morgun tilkynntu svo yfirvöld í Massachusetts að markverð fjölgun hefði orðið á tilfellum að undanförnu.
Í Hollandi hefur smitum fjölgað talsvert, að því er fram kemur í frétt NL Times. Eru tilfellin nú tvöfalt fleiri en á sama tíma í fyrra. Þá hefur verið greint frá því að í Kína hafi fjölmörg börn leitað til læknis vegna lungnabólgu.
Læknar telja að ekki sé um að ræða nýjan öndunarfærasjúkdóm heldur miklu frekar RS-vírusinn sem kemur jafnan upp á þessum árstíma og getur valdið slæmum veikindum hjá börnum.
New York Post hefur eftir John Kelly, lækni hjá Redwood Pediatrics, að vírusinn geti valdið lungnabólgu. Flestir sjúklingar læknist á nokkrum dögum án aðkomu lækna eða heilbrigðisstarfsfólks.
