Jake Daniels, leikmaður Blackpool, er eini enski knattspyrnumaðurinn sem er opinberlega samkynhneiður. Hann reiddist við að sjá Jordan Henderson, þá fyrirliða Liverpool, fara til sádiarabíska félagsins Al Ettifaq í sumar.

Fjöldi stjarna elti peningana til Sádí í sumar og Henderson þar á meðal. Samkynhneigð er ekki viðurkennd í landinu en Henderson hafði verið ötull stuðningsmaður hinsegin fólks.

„Hann sendi mér skilaboð þegar ég kom út, studdi mig og sagðist stoltur af mér. Að sjá hann fara til Sádí var eins og að fá blauta tusku í andlitið,“ segir Daniels í viðtali við BBC.

„Þetta er auðvitað pirrandi en peningar hafa greinilega meiri þýðingu fyrir fólk.“

Henderson hafði verið á mála hjá Liverpool síðan 2011 og þá á hann að baki 81 A-landsleik fyrir Englands hönd. Hann var harðlega gagnrýndur þegar hann fór til Sádí í sumar í ljósi stuðningsins við hinsegin samfélagið í gegnum árin.