Gareth Southgate þjálfari enska landsliðsins vill ekki sjá það að konur leikmanna verði í sviðsljósinu á Evrópumótinu í Þýskalandi á næsta ári.
Englendingar eiga slæmar minningar frá stórmóti í Þýskalandi eftir HM árið 2006.
Þá voru eiginkonur leikmanna meira og minna í sviðsljósinu en þar mátti finna Victoriu Beckham, Coleen Rooney og fleiri. Voru ensk blöð full af fréttum um ferðir þeirra á næturklúbba og fleira.
Konurnar voru staðsettar nálægt landsliðinu og voru áberandi í kringum liðið. „Ég var ekki á þessu móti svo ég veit ekki alveg hvernig þetta var en við erum með frábært umhverfi í dag,“ segir Southgate.
„Við viljum auðvitað að fjölskyldur leikmanna njóti mótsins. Þau fá að heimsækja leikmenn, það breytist andrúmsloftið þegar það gerist og leikmenn brosa sérstaklega þegar börnin þeirra koma.“
Englendingar töpuðu ekki leik í undankeppni EM og eru taldir líklegir til árangurs í Þýskalandi næsta sumar.
