Kári Árnason, yfirmaður knattspyrnumála hjá Víkingi var gestur í Íþróttavikunni um helgina. Þessi fyrrum landsliðsmaður í knattspyrnumaður fór víða yfir sviðið.

Í vikunni voru fréttir af því að Arnar Gunnlaugsson væri mættur í viðræður við Norköpping í Svíþjóð en dregið var í land með það.

Kári telur ansi líklegt að nokkur félög séu að skoða Arnar. „Mér finnst mjög líklegt að það sé mjög mikill áhugi, það hefur ekkert formlega borist okkur ennþá,” segir Kári

„Við viljum halda honum eins lengi og auðið er, það er erfitt. Hann hefur sannað sig sem frábær þjálfari og besti þjálfari Íslands í dag. Það er eðlilegt að það sé áhugi.“

Hrafnkell Freyr Ágústsson telur meiri líkur en minni á því að Arnar fari út í vetur. „Ég held að það sé líklegt, fari í miðlungs lið í Svíþjóð eða Danmörku og geti svo unnið sig svo í toppliðin,“ segir Hrafnkell.

Kári vinnur afar náið með Arnari og ber honum söguna vel. „Það er æðislegt, hann stjórnar liðsvalinu og ég á ekkert við. Hann er sjarmerandi og flottur leiðtogi.“

„Við tuðum alveg í honum endalaust varðandi ákveðin atriði, við áttum okkur á því að hann stjórnar þessu. Við reynum að koma okkar skilaboðum til skila en það er ekki alltaf sem hann hlustar. Við segjum okkar skoðun á varnarleiknum, oft tekur hann mark á því en ekki alltaf.“

Kári segir planið hjá sér vera að ef Arnar fer að aðstoðarþjálfarinn, Sölvi Geir Ottesen taki við. „Það er þannig sem ég horfi á það, að það sé samfella í starfinu. Að við byggjum ofan á það sem fyrir var, það er mín stefna með Víking að við byggjum ofan á það sem Arnar hefur byggt upp og bætum það sem við teljum þurfa að bæta.“

Hann segir áhættu vera í því að fara í algjörlega nýja stefnu ef Arnar fer. „Það er rosa risky move, við verðum að standa og falla með því að keyra þessa stefnu.“

„Það eru fáir betri þjálfarar að læra undir en Arnar, Sölvi er þannig úr garði gerður að hann hefur margt í þetta.“