Mikael Nikulásson þjálfari KFA og sérfræðingur Þungavigtarinnar efast um það að Age Hareide sé réttur maður til að stýra landsliðinu áfram. Hareide hefur ekki náð að finna taktinn með íslenska liðinu.

Hareide tók við í vor eftir að stjórn KSÍ tók þá ákvörðun að reka Arnar Þór Viðarsson úr starfi eftir tvo leiki. Vonbrigðin hafa verið nokkur eftir að Hareide tók við.

Íslenska liðið fékk skell í Slóvakíu í gær en liðið á sæti í umspili um laust sæti á EM sem fram fer í mars, það er vegna árangurs liðsins hjá Arnari í Þjóðadeildinni.

„Þetta er grátleg frammistaða og þetta er falleinkunn á þjálfarann, þeir segjast vera á réttri leið leikmennirnir. Á hvaða réttu leið? Til hversu eru leikmenn að segja það alltaf, við erum ekki á neinni réttri leið,“ sagði Mikael í þætti dagsins.

„Hefur einhver landsliðsþjálfari fengið auðveldara jobb? Hann kemur inn og vita allir að umspilið er klárt. Liðið er lélegra en hjá Arnari Viðarssyni, þar voru framfarir.·“

„Það vantar svo rosalega mikið, varnarleikurinn er skelfilegur. Þetta er skandall þessi riðill.“

„Ég er búinn að verða fyrir gríðarlegum vonbrigðum frá því að hann tók við, ég er orðinn þreyttur á þessu. Við getum farið á EM og það er bara Arnari Viðarssyni að þakka, hann kom okkur í þá stöðu.“

Kristján Óli Sigurðsson sem var einnig í þættinum vill reka Age og fá inn Freyr Alexandersson.

„Ég mæli með að við finnum gott pláss fyrir Age á Grund í Osló og þökkum honum fyrir vel unninn störf, borgum honum út samninginn sem er fram í mars. Fáum Freyr Alexandersson inn, hann má þjálfa Lyngby með á sama tíma. Þetta eru bara tveir leikir í umspili og svo skoðum við stöðuna.“