„Þetta er ofboðslega skrýtið allt saman og ef það skyldi síðan ekki verða gos þá veit ég samt ekki hvort ég treysti mér til að vera þarna í framtíðinni,“ segir Kristín Ósk Högnadóttir, gift þriggja barna móðir, sem þurfti að yfirgefa Grindavík á föstudagskvöldið vegna yfirvofandi eldgoss.

Kristín og fjölskylda halda til hjá foreldrum Kristínar í Hveragerði. Þeim vannst ekki tími til að taka mikið af eigum sínum með sér og auglýsti Kristín á Facebook eftir íþróttabúnaði fyrir börn sín, 8, 12 og 15 ára. Þau eru öll í íþróttum og vill Kristín koma þeim sem fyrst á æfingar hjá Hamar í Hveragerði svo þau hafi eitthvað fyrir stafni.

Kristín og hennar fólk eru ekki í hópi þeirra sem verður hleypt inn til Grindavíkur í dag. „Við erum ekki í þeim hópi, við erum það neðarlega í bænum. Við erum í Norðurvörinni,“ segir Kristín.

„Þetta er svo nýlega skeð að maður hefur ekki náð áttum. En fólk er rosalega duglegt að bjóða manni eitt og annað. Það sem aðallega vantar núna er íþróttafatnaður fyrir þann elsta.“

Pilturinn sem um ræðir er 15 ára gamall. Hann er 170 cm á hæð og notar fatastærðir frá S til M í fullorðinsfötum. Hann notar skóstærðir 42-43. Þeir sem geta aðstoðað með þetta eru beðnir um að hafa samband við Kristínu í síma 866 6927. 

„Maður er ekki alveg í sambandi núna en það hafa allir verið rosalega almennilegir við okkur. Fólk er virkilega reiðubúið að bjóða fram hjálp og aðstoð,“ segir Kristín, sem er þakklát almenningi fyrir hvernig fólk hefur brugðist við hamförunum í Grindavík og virðist reiðubúið að koma Grindvíkingum til hjálpar.