Um helgina birtist kveðja til Grindvíkinga á heimasíðu Vestmannaeyjabæjar vegna þeirrar atburðarásar sem er í gangi þar. Bærinn var rýmdur á föstudagskvöld og ríkir mikil óvissa um framhaldið. Í kveðju Eyjamanna stóð meðal annars:
„Þið getið reitt ykkur á að við Eyjamenn munum gera allt sem í okkar valdi stendur til að létta undir með ykkur og aðstoða ef á þarf að halda. Það hefur líka verið ánægjulegt að sjá hversu margir Vestmanneyingar hafa nú þegar upp á eigin spýtur boðið fram húsaskjól og aðra aðstoð; örugglega minnugir þess hversu vasklega Grindvíkingar gengu fram í aðstoð við okkur í eldgosinu á Heimaey fyrir 50 árum. Það gleymist aldrei.“
Páll segir í samtali við Morgunblaðið í dag að kveðjunni hafi verið vel tekið.
„Við vildum lýsa vilja okkar til að hlaupa undir bagga, eins og svo sem allir landsmenn eru að gera, en þetta stendur alveg sérstaklega upp á okkur Eyjamenn því Grindvíkingar sýndu okkur alveg ótrúlegan stuðning í kjölfarið á gosinu í Heimaey fyrir 50 árum, opnuðu hús sín og buðu okkur velkomin,“ segir hann.
Hann bendir á að margir Eyjamenn hafi flutt til Grindavíkur á sínum tíma og sumir hafi ekki enn komið heim aftur af ýmsum ástæðum.
„Okkur rennur blóðið til skyldunnar að gjalda líku líkt hvernig Grindvíkingar komu drengilega fram við okkur á sínum tíma,“ segir Páll og bætir við að staðan í Grindavík rífi eflaust upp einhver gömul sár fyrir Eyjamenn.
„Ég held svo sem að enginn átti sig á því fyrr en reynt hefur hvað það er að vera allt í einu neyddur til að yfirgefa heimili sitt í algjörri óvissu um það hvort það verði einhvern tímann snúið aftur,“ segir Páll við Morgunblaðið.
