Íþróttavikan heldur áfram að rúlla á 433 og í Sjónvarpi Símans. Helgi Fannar Sigurðsson og Hrafnkell Freyr Ágústsson hafa umsjón með þættinum og gestur þeirra að þessu sinni var Eggert Aron Guðmundsson, leikmaður Stjörnunnar.
Þær fréttir bárust í vikunni að Vanda Sigurgeirsdóttir myndi ekki gefa kost á sér til formennsku KSÍ áfram.
„Maður er búinn að heyra þetta í svona 2-3 mánuði. Hún mun nú einbeita sér að því sem hún hefur ástríðu fyrir, sem eru eineltismál og það er bara flott að fá hana aftur í það,“ sagði Hrafnkell um það.
Hann segir hana geta unað nokkuð vel við tíma sinn í Laugardalnum.
„Hún kom inn á erfiðasta tíma í íslenskri knattspyrnu. Það sem stendur upp úr hjá mér frá hennar tíma er að hún réði Age Hareide. Ég vona að hann framlengi.
Minn draumakandídat (til formanns) er Kári Árnason. Ég held að hann gæti komið inn af krafti og verið með sterkar skoðanir.“
Hrafnkell telur þó ekki líklegt að Kári, sem er yfirmaður knattspyrnumála hjá Víkingi, taki við starfi formanns KSÍ.
„Ég sé hann ekki gera það. Víkingur er á frábærum stað og þokkalegur möguleiki á að þeir fari í riðlakeppni á næsta ári. Ég held hann fari ekki frá því strax. Hann mun samt einhvern tímann fara í þetta gigg.“
Umræðan í heild er í spilaranum.
