Nýliðum Fylkis var af flestum spáð falli fyrir tímabil en að lokum hélt liðið sér uppi nokkuð örugglega, var fjórum stigum frá fallsvæðinu.
„Við vorum ekkert að pæla í því hvar okkur var spáð í töflunni. Íþróttir almennt eru þannig að þú þarft bara að leggja þig fram í þetta og vera vel þjálfaður til að ná árangri. En þetta getur farið á alla vegu. Við vorum til dæmis óheppnir með meiðsli snemma móts og lentum í mótlæti. Við stóðum það af okkur og það var svolítið sætt,“ segir Rúnar.
„Við erum með góða fótboltastráka sem eru margir hverjir að stíga sín fyrstu skref í efstu deild. Ég vissi að eftir að við fórum upp úr næstefstu deild að við gætum alveg staðið okkur. Við vorum búnir að spila æfingaleiki þar sem við vorum að standa í og vinna þessi neðri sex lið svo ég hafði fulla trú á þessu komandi inn í tímabilið. Það er svolítið góð tilfinning. Og þetta lið verður bara betra. Við erum á þannig aldri að pílan okkar er bara upp á við.“
Rúnar hélt að miklu leyti tryggð við hópinn sem kom liðinu upp úr Lengjudeildinni haustið 2022 í Bestu deildinni í ár. Það bar árangur og mikil og öflug liðsheild skapaðist.
„Við hefðum alveg getað fengið inn einhverja leikmenn en þá hefðu þessir strákar getað misst af tækifærinu til að spila sjálfir. Ég veit að þú verður að spila á þessum aldri og þeir stóðu undir því. Það er ótrúlega mikilvægt að gefa þá trú inn í hópinn að þeir séu nógu góðir til að spila á meðal þeirra bestu.“
Fylkismenn enduðu tímabilið í Bestu deildinni með stæl, unnu Keflavík 3-1 og Fram 5-1. Skiptir það miklu máli að enda tímabilið á jákvæðum nótum?
„Það gerir það. Þú gleymir öllum hinum leikjunum þar sem þú stóðst þig ekki nógu vel. Að klára þetta svona í lokaumferðinni gefur okkur þvílíkt boozt inn í veturinn. Þetta er langur vetur þó hann styttist alltaf því mótið er alltaf að byrja fyrr.“
Nú tekur við þriðja heila tímabil Rúnars hjá Fylki. Hann er samningsbundinn félaginu út næstu leiktíð og líður honum afar vel.
„Mér líður mjög vel í Árbænum. Það er frábært fólk að vinna þarna og góð umgjörð, vel hugsað um okkur og allt til alls. Ég er mjög ánægður. Það er ekkert vesen. Þú færð bara vinnufrið og það er það sem skiptir öllu máli,“ segir Rúnar.
Næsta sumar verður Fylkir á sínu öðru tímabili eftir að hafa farið upp. Trúir Rúnar á svokallað „annars tímabils heilkenni (e. second season syndrome)“?
„Ég pæli ekkert voða mikið í því. Ég hef svosem ekki þjálfað lið í svoleiðis aðstæðum. Mér finnst Fylkisliðið vera að taka rétt skref og held að það verði betri á næstu leiktíð en í ár. Ár númer tvö, ég er ekki að pæla í einhverju svoleiðis kjaftæði. Þú þarft bara að hafa trú á þessu og ég hef það.“
Rúnar telur Fylki geta gert atlögu að efri hluta Bestu deildarinnar næsta sumar.
„Við viljum vera í kringum þessi bestu lið og ég hef alveg trú á að við getum farið þangað ef við erum heppnir með meiðsli og lendum ekki í svona hrakförum með leikmenn eins og í sumar,“ segir Rúnar Páll Sigmundsson.
Ítarlegt viðtal má nálgast í spilaranum.
