Það virðast ansi margir vera farnir að máta sig við stólinn hjá formanni KSÍ og vera farnir að skoða það að bjóða sig fram til formanns í febrúar. Óvissa er hvort Vanda Sigurgeirsdóttir, sitjandi formaður bjóði sig fram.
Vanda hefur ekki viljað gefa það út hvort hún ætli að gefa kost á sér á nýjan leik þegar ársþingið fer fram í febrúar.
Dr. Football sagði frá því í gær að Þorvaldur Örlygsson, fyrrum landsliðsmaður í knattspyrnu væri að skoða að gefa kost á sér. Þungavigtin segir svo frá því að Guðni Bergsson skoði að bjóða sig fram á nýjan leik.
„Eru þið búnir að heyra það nýjasta, Guðni Bergsson ætlar að bjóða sig fram gegn Vöndu ef hún býður sig fram. Þetta er sagan,“ segir Ríkharð Óskar Guðnason, stjórnandi Þungavigtarinnar og íþróttafréttamaður hjá Sýn.
Guðni sagði upp störfum hjá KSÍ fyrir rúmum tveimur árum og tók Vanda þá við starfinu. Þungavigtar bræður telja að Vanda bjóði sig ekki fram miðað það að hún hafi ekkert gefið út.
„Hún er væntanlega að kasta inn hvíta handklæðinu, hún er búinn að gera allt í lagi. Ekki búinn að gera neitt af sér en ekki breyta íslenskum fótbolta neitt,“ segir Kristján Óli Sigurðsson.
Mikael Nikulásson þjálfari KFA segir að tíminn fyrir Vöndu hafi verið naumur. „Hún er ekki búin að gera neitt, ekki gott né slæmt. Þetta er líka mjög stuttur tími, þetta er fljótt að líða.“
Guðni Bergsson sagði af sér eftir erfið mál í kringum landsliðsmenn Íslands þar sem frægt viðtal við RÚV spilaði stórt hlutverk í afsögn hans.
„Það var ekkert honum að kenna að RÚV hafi tekið hann í viðtal og reynt að koma honum frá völdum. Hann átti aldrei að fara í það viðtal, það var upphafið að endinum. RÚV má ævinlega skammast sín fyrir þau vinnubrögð, hann hafði ekkert sökótt unnið,“ sagði Kristján Óli.
„Guðni getur mætt með hreinan skjöld,“ segir Kristján en Guðni var formaður KSÍ í rúm fjögur ár.
