Hæstaréttarlögmaður, sem starfar á stórri lögmannsstofu í Reykjavík, er grunaður um alvarlega líkamsárás. Mannlíf greindi frá.

Samkvæmt heimildum Mannlífs átti árásin sér stað á vinnustað þolandans, sem er annar karlmaður. „Heimildir Mannlífs herma að þolandinn hafi í hið minnsta nefbrotnað og rifbein brákast. Lögregla var kölluð til í kjölfar árásarinnar. Tveir menn urðu vitni að atvikinu og stigu inn í atburðarásina til þess að aðstoða þolandann. Lögregla ræddi við lögmanninn sem sagði manninn hafa ógnað sér með hníf og því hafi hann brugðist við með því að ráðast á hann. Hvorki vitni né lögregla urðu vör við hníf á vettvangi og fannst hann ekki við leit,“ segir í fréttinni.

Samkvæmt heimildum DV tengist eiginkona þolandans málinu. Hún er einnig lögmaður, rétt eins og hinn grunaði árásarmaður. Vinna þau á sömu lögmannsstofu. Deilur er varða ástarmál eru sagðar tengjast árásinni.

Samkvæmt frétt Mannlífs leitaði árásarþolinn á bráðamóttöku í kjölfar árásarinnar. Hann hyggst leggja fram kæru.