Íþróttavikan kemur út alla föstudaga á 433.is og í Sjónvarpi Símans. Þar fá þeir Helgi Fannar Sigurðsson og Hrafnkell Freyr Ágústsson til sín góðan gest og ræða það helsta úr heimi íþrótta. Að þessu sinni var gesturinn fótboltaþjálfarinn og hlaðvarpsstjarnan Viktor Unnar Illugason.

Það varð ljóst á dögunum að Katarinn Sheikh Jassim eignist ekki Manchester United en hann vildi eignast félagið í heild. Þess í stað er Sir Jim Ratcliffe að eignast 25% hlut en Glazer fjölskyldan óvinsæla verður áfram.

„Ég veit það verða einhverjir stuðningsmenn Manchester United pirraðir því það breytist kannski ekki mikið. Glazerarnir eru enn þá þarna,“ sagði Helgi í þættinum.

„Ratcliffe er líka ekki að koma með fjármuni í nýjan völl eða æfingasvæði. Hann vill fá að stjórna fótboltahlutanum því hann telur sig vita meira um það en Glazer,“ sagði Hrafnkell um málið.

Viktor telur að United þurfi að ráða yfirmann íþróttamála fyrst og fremst.

„Það þarf að gera það. Það er alltaf bara ráðinn þjálfari sem kaupir bara sína leikmenn, eins og Erik ten Hag núna. Svo er hann rekinn og það kemur nýr þjálfari inn með sína leikmenn. Þannig er þetta búið að rúlla í mörg ár og þess vegna er allt í fokki þarna.“

Umræðan í heild er í spilaranum.