Það var í janúar árið 2022 sem Barcelona og Xavi þjálfari liðsins var að skoða það að styrkja miðsvæði félagsins og vildi fá Arthur Melo frá Juventus.

Arthur hafði verið hjá Barcelona í tvö ár en fór til Juventus í skiptum fyrir Miralem Pjanic.

Xavi vildi fá inn miðjumann og skoðaði Arthur en ræddi það við Sergio Busquets sem hafði ekki fallegar sögur að segja um Arthur.

Busquets mun samkvæmt spænskum blöðum hafa ráðlagt Xavi að sleppa því, vildi hann meina að Arthur hugsaði ekki vel um sig utan vallar og væri slæm fyrirmynd fyrir unga leikmenn.

Arthur var lánaður til Liverpool nokkrum mánuðum síðar þar sem hann var mikið meiddur og fann sig svo sannarlega ekki þar.

Arthur var lánaður til Fiorentina í sumar frá Juventus og hefur farið vel af stað þar en hann er aðeins 27 ára gamall.