Fjölmiðlar um allan heim greina nú frá því að allt að 500 manns hafi látið lífið í loftárás ísraelska hersins á spítala á Gaza-svæðinu.

Í fréttum BBC kemur fram að herinn segist vera með atvikið til rannsóknar. Talsmenn Hamas sem farið hefur með stjórn Gaza undanfarin ár að árásin sé hreinræktaður stríðsglæpur. Spítalinn hafi hýst hundruðir veikra einstaklinga og manna sem hafi neyðst til að flýja heimili sín vegna árása Ísraelshers. Hundruð séu föst undir braki úr byggingunni sem hýsti spítalann.

Á myndum af vettvangi má sjá blóði drifna einstaklinga borna út úr brakinu og lík liggja í því miðju.

Læknir á spítalanum sem BBC ræddi við segir algjöra örvæntingu og ringulreið ríkja á staðnum. Alls hafi 4.000 manns nýtt spítalann sem skjól undan fyrri árásum. Hann segir 80 prósent spítalans óstarfhæfan og hundruðir manna hafa slasast eða látist í sprenginunni.

Mahmoud Abbas forseti Palestínu hefur lýst yfir þriggja daga þjóðarsorg.

Í fréttum CNN kemur fram að heilbrigðisyfirvöld á Gaze segi að fyrsta mat á fjölda fallinna bendi til að 200-300 manns hafi látist. Ísraelski herinn segist nú rannsaka atvikið og vill meina að enn sem stendur sé ekki ljóst hvort að spítalinn varð fyrir sprengju frá ísraelska flughernum eða misheppnuðu eldflaugaskoti Hamas.